حلويات جميلة وراقية في منظرها ومذاقها

موقع شهيوات زكية لكل ما يهم المرأة العربية

موقع شهيوات زكية  لكل ما يهم المرأة العربية يقدم

حلويات جميلة وراقية في منظرها ومذاقها

مقادير العجين والطريقة



رابعة الزبدة او ماركرين نوع جيد
كاس سكر + قبيصة ملح
ثلاث بيضات { جوج كاملين وصفار واحدة
جوج معالق كبار مايزينة
شوية اللوز مطحون جيدا بقشورو { ممكن نعوضوه بالكوك محمر ومطحون او لي حبيتو مسالة اختيارية
الفاني والقليل جداااا من الخميرة د الحلوى
الدقيق حسب الخليط مابين 500 حتى 600 غرام والعجين يكون لين
بالنسبة للتزيين غنحتاجو لاشياء اخرى غنعرفوها فاعداد كل شكل لوحده





نخلو العجين يرتاح فالثلاجة لساعتين او ثلاث ونشكلوه حسب الرغبة ونطيبو جميع الاشكال ديالنا وعاد ندوزو لمرحلة التزيين



بالنسبة لهاد الشكل


غنعملو من العجين مربعات 

وغنحتاجو لمول سيليكون على شكل مربع ونعمروه بالشكلاط دايب نخلوه حتى يجمد ولصقوه فوق مربع الصابلي بالكنفتير او النسلي ونزينو الجوانب باللوز محمر ومهرمش ونعمرو الفراغ ديال مربع الشكلاط بالنسلي او لي متوفر عندكم نخليكم مع الصور باش توضح اكثر











اما بالنسبة لهاد الشكل



غنشكلو من العجين معينات وحدين مثقوبين والاخرين عاديين ؛ منين يطيبو ندهنو وجه المعينات المثقوبين بالكنفتير او النسلي وندردرو عليهم اللوز مهرمش ولصقوهم مع المعينات الاخرى ونملؤ الفراغ بالكنفتير الاحمر لي غليناه شوية مع معلقة سكر كلاصي باش يقبط راسو فالحلوى وميسيحش ويعطيه اللمعان : نخليكم مع الصور





بالنسبة لهاد الشكل الجميل ممممم



ناخذو جزء من العجين ونسموه بالنسكافي ونشكلو من العجين دوائر ومنين يطيبو لصقو جوج مع بعضهم ونغطسو وجه الحلوى فالشكلاط ونعملو نقيطات من الشكلاط الابيض ونعملو حركات دائرية بواسطة عود صغير او اي شئ حتى نتحصلو على داك الشكل ونخلوه حتى ينشف وندهنو الجوانب بالمربى ونزينو باللوز مهرمش او كاوكاو او حتى الكوك محمر : نخليكم مع الصور















اما هاد الشكل فهو لذييذ وغني



غنشكلو من العجين دوائر صغيرة ونعملوهم فمولات صغار ونثقبوهم مزيان باش ميتنفخوش وندخلوهم يطيبو من بعد نعمروهم بهاد الحشوة
كل واحد ولي موجود عندو . انا عملت شوية الكركاع مصهد + كاوكاو محمر + زبيب مقطع + زنجلان محمر + شوية اللوز شاط لي وممكن نعملو حتى الشريحة مقطعة طريفات صغار تتجي هائلة نسموهم بشوية القرفة ونجمعوهم بعسل جيد ونعمرو دوك السليلات ونزينو بخطوط من الشكلاط { نخليكم مع الصور













بالنسبة لهاد الشكل



غنشكلو من العجين دوائر صغيرة على قد مول السليكون وندخلوهم يطيبو
غتحتاجو كذلك كمية قليلة من الكوك محمر وجمعتو بنيسلي وغنحتاجو شكلاط ابيض او اسود حسب الذوق ومول سليكون على شكل دوائر صغيرة
نعملو القليل من الشكلاط وسط دوائر المول وفوقهم كويرة صغيرة من الكوك والنيسلي ونعاود نغطي بالشكلاط وندخلهم للمجمد حتى ينشفو ونزولوهم من المول ولصقو دائرة الشكلاط المحشية بدائرة الصابلي ونزينوهم بخطوط من الشكلاط { دائما مع الصور لايضاح الفكرة 

بالنسبة لهاد الشكل



ناخدو جزء من العجين ونسمتو بقشرة الحامض وعملتو على شكل مستطيل كمية عادية والكمية الاخرى مثقوبة ومنين طابو عملت السكر كلاصي فوق المستطيلات المثقوبة ولصقتهم بمربى المشمش والوسط عملت مربى الفريز لي غليتو شوية مع ملعقة سكر كلاصي ونخليكم مع الصور







اما بالنسبة لهاد الشكل لي سميتو صابلي الثليجة فسبق لي عملتو فموضوع مستقل لكن مافيها باس نذكركم بيه هو عبارة عن دوائر صابلي وعملت فوقهم وريدات من حلوة الكوك المعلكة تيجي راااائع خاصة منين منين تنسمو الصابلي بالحامض وكذلك بياض البيض مع الكوك تنحك فيه قشرة الحامض








وكنتيجة نهائية تنتحصلو على هاد البلاطو الجميل لي تنتمنى انو يعجبكم وكيف تتشوفو حلويات راقية وبدون كثرة الوان اصطناعية لي تضر بالصحة احنا تنعرفو ان اصلا كثرة الحلويات غير صحية ولكن تتبقى داخلة فثقافتنا وحياتنا كمغاربة في مناسباتنا وافراحنا وكذلك مع اسرنا وضيوفنا لذلك نتفاداو على الاقل الالوان والمذاقات الصناعية
وكنصيحة نقصو من كمية السكر فالعجين لاننا غنضيفو الحلاوة فالتزيين
نتمنى موضوعي يعجبكم بعد هاد الغيبة عن المنتدى ومزال اشكال اخرى وافكار اخرى ومن عجين واحد
لي عجبها موضوعي تدعو لي بصلاح الذرية ولجميع المسلمين