بايلا سهلة وبنينة

بايلا سهلة وبنينة

السلام عليكم

جيت نشركم طريقتي ف بايلا سهلة مهلة ولكن كتجي بنينة بزاف

بعد مرات كنزيد حتى دجاج والكين أكترية كنديرها غي بفواكه البحر


المقادير

نحتاج خيزو مقطع صغير

بصلة مشلضة

4 دروس توما

فلفلة ألوان أو خضرة أو لمتوفر مقطعين أطراف صغار

جلبانة

خليط فواكه البحر

قشور حامضة

1 مطشة مقطعة أطراف صغار

زيت زيتون

ورق موسى

العطرية : ملح ،ابزار ، سكنجبير ، خرقوم ، شوية ملون ، شوية تحميرا ، شوية كمون ، ربيع

1 معلقة كبيرة مطشة دلهك مطلوقة ف شي ديال الماء

كاس كبير روز أو حسب عدد الأفراد أنا ستعملت هدا حنا 3 أشخاص كيجي هو هداك

2 كيسان ونص ما ( نفس كاس باش خديت روز )




الطريقة

كندير بصلة مشلضة توما محكوكة قشور حامضة وورق موسى مع زيت زيتون والملح ونخليه يتشحر مزيان



كنضيف فلفلة من بعد مطشة


تم فواكه البحر والعطرية ونزيد جلبانة وخيزو ونخلي يتشحر شوية


ونزيد روز ونخليه يتشرب مزيان داك الخليط ونزيد الماء تم مطشة د الحك و نخليه يطيب ملي يوصل نص طياب


كندير ف قالب كيدخل الفرن ونزوق بقمرون وندخلو يكمل طيابو ويتحمر من لفوق ( أنا كيعجبني ف فرن خصوصاً ديك طبقة الفوقانية كتجي مقرمشة يمي يمي )

وكين لكيبغي هكاك بلا فران يخليه يطيب غي ف طنجرة حتى يشرب

وهاهي بصحة وراحة



كيعجبني ناكلها مع هريسة والحامض